Það var fjölmenni á fyrsta fundi Lean faghópsins þegar Þórunn M. Óðinsdóttir stjórnunarráðgjafi hélt kynningu á grunnatriðum Lean í HR í morgun. Hátt í 90 manns mættu og var afar ánægjulegt að sjá hversu mikinn áhuga málefnið vakti, sérstaklega í ljósi þess að þetta er fjórða árið í röð sem Þórunn heldur kynningu um þetta efni í upphafi vetrar á vegum Lean faghópsins. Farið var yfir hugmyndafræðina í stuttu máli, s.s. að allir í fyrirtækinu leitist markvisst að því að eyða sóun og skapa það virði sem viðskiptavinurinn vill, ferlin eru notuð til stöðlunar og markvisst sé leitað að umbótatækifærum í þeim, mikilvægi stöðugra umbóta með virkri þátttöku allra starfsmanna en ekki bara stjórnenda og allt skipulag og öll ferli séu byggð upp á ,,pull í staðin fyrir ,,push þannig að vörurnar eða þjónustan er toguð út úr ferlunum í staðin fyrir að verið sé að þrýsta þeim áfram með tilheyrandi sóun. Þá var farið yfir nokkrar helstu aðferðirnar sem fyrirtæki hér á landi eru að nota og dæmi tekin um árangur sem náðst hefur með þessari hugmynda - og aðferðafræði. Gefinn var góður rómur af kynningunni sem samanstóð af glærum, spjalli og svo skemmtilegum leik í lokin. Þetta var hressileg byrjun á starfsemi Lean faghópsins í vetur og eru allir hvattir til að mæta á næsta viðburð hópsins í Orkuveitunni þann 15. Okt kl. 08:30.
16. september 2014 14:25
