Forsíða / Faghópar / Breytingastjórnun

Breytingastjórnun

Markmið hópsins er að auka vægi breytingarstjórnunar á Íslandi með því að bjóða upp á fræðandi og hvetjandi fyrirlestra frá fyrirtækjum, stofnunum og háskólum. Metnaður er lagður í að bjóða upp á fyrirlestra sem gefa áhorfendum aukna kunnáttu, færni og innsæi í breytingastjórnun sem nýtist þeim strax í starfi.

Breytingastjórnun er víðfeðm þar sem hún getur snert á flestu sem viðkemur rekstri og framþróun, hvort sem er fyrir einstaklinga, hópa eða fyrirtæki. Fagið snýst mikið um að hafa áhrif á mannskepnuna og er gjarnan gert með andstæðum aðferðum verkfræði og sálfræði sem nýtist m.a. við stjórnun og stefnumótun. Eins skipulagðar og breytingar eru í upphafi þá einkennast þær ætíð af viðbragði við aðstæðum sem upp koma, mannlegum og skipulagslegum, sem gjarnan skera úr um endanlegan árangur.

Faghópurinn var stofnaður haustið 2012 og fékk endurnýjun lífdaga vorið 2021. Hópurinn samanstendur af einstaklingum sem hafa áhuga, menntun og reynslu af breytingastjórnun.

Viðburðir

24 mar. 2026

From project management to change leadership - you can´t KPI your way out of this.

24. mar. 2026 08:30 - 10:00 / Isavia ohf. 1.hæð

english below!

Faghópur Stjórnvísi um breytingastjórnun býður ykkur velkomin til staðfundar þriðjudaginn 24. mars kl 8:30-10:00 í húsnæði Isavia ohf. Dalshrauni 3 (1.hæð) í Hafnarfirði. Þar munu Arna Ósk Arnarsdóttir mannauðsstjóri Isavia Innanlandsflugvalla og Lisa Richardsson ráðgjafi og partner hjá Conscious Consulting segja okkur frá stóru og umfangsmiklu umbreytingaverkefni sem þær unnu að með stjórnendum öryggisleitar Keflavíkurflugvallar, en öryggisleitin er fjölmennasta deild flugvallarins. Erindið verður á ensku.

Lisa and Arna share with us their experience of working with one of the most regulated and high-pressure environments imaginable, passenger security at KEF Airport, in changing the culture.
Despite solid project delivery, clear governance, and strong operational control, change repeatedly stalled. Not because the plan was wrong but because the leadership lens was too narrow. The breakthrough came when leadership stopped treating culture as a side-effect of systems and processes, and instead began to lead the whole system:

people’s experience, behaviour under pressure, relationships, trust, and the structures shaping everyday decisions.

Hlökkum til að sjá sem flesta.
Faghópur um breytingastjórnun

13 feb. 2026

Endurmörkun vörumerkis - Ferðalag Heima

13. feb. 2026 09:00 - 10:00 / Skrifstofa Heima

Faghópur Stjórnvísi í Breytingastjórnun býður til fundar þar sem Pétur Rúnar Heimisson, markaðs- og samskiptastjóri Heima, fjallar um eitt umfangsmesta breytingaverkefni sem skráð félag getur ráðist í: heildarendurmörkun og endurskilgreiningu vörumerkis.

Pétur fer yfir vegferðina frá Regin yfir í Heima og rýnir í hvernig nýtt nafn, ný ásýnd og ný frásögn voru mótuð og framkvæmd – bæði út á við og innan félagsins. Þá verður einnig fjallað um hvernig Heimar hóf að starfa í auknum mæli í takt við kjarnastefnu félagsins og hvernig ákvarðanataka, forgangsröðun og rekstrarlegar áherslur voru stilltar af til að styðja við stefnuna í verki.

Erindið verður praktískt og lærdómsríkt: hvað reyndist vel, hverjar helstu áskoranirnar voru og hvaða atriði skipta mestu máli þegar taka á fólk og markað með í svona stórt ferðalag.

Fyrirlesari:
Pétur Rúnar Heimisson fer fyrir markaðsmálum, samskiptum og viðskiptavinaupplifun hjá Heimum en áður starfaði hann sem markaðsstjóri Borgarleikhússins og við markaðsmál hjá Nova.

Staðsetning:

Skrifstofa Heima, Hagasmári 1 (Smáralind), gengið inn í vesturenda suðurhliðar.

15 okt. 2025

Fáum fólkið með - Lykillinn að árangursríku ferðalagi

15. okt. 2025 08:30 - 10:00 / Isavia - Dalshrauni 3

Faghópur Stjórnvísi í breytingarstjórnun og Isavia bjóða til fundar þar sem Ásta Lára Jónsdóttir, deildarstjóri verkefnahúss UT og Þröstur Elvar Óskarsson, verkefnastjóri verkefnahúss UT munu segja okkur frá breytingarstjórnun í tengslum við stórt innleiðingarverkefni hjá Isavia.

Í erindinu deila Ásta Lára og Þröstur reynslu af breytingastjórnun í tengslum við stórt innleiðingarverkefni þar sem Microsoft Dynamics var tekið upp á áföngum og aðrar lausnir lagðar af. Fyrsti áfangi sneri að útfærslu á upplýsinga,- skjala og samningastjórnun í Viskunni (Microsoft Dynamics) og útleiðingu eldra skjalakerfis. Lögð var sérstök áhersla á að byggja upp markvissa breytingastjórnunarvinnu með verkefnateyminu – meðal annars með sérstakri breytingahandbók. Handbókin varð eitt helsta vinnutólið í gegnum breytingarnar en í henni voru skilgreindar þær breytingar sem áttu sér stað, mótun vörunnar og markaðssetning hennar, kortlagning markhópanna, mótun skilaboða og mælanlegra markmiða auk þess að fylgja eftir áhrifum breytinganna.

Við munum fara yfir hvað virkaði vel, hvað hefði mátt betur fara og hvers vegna virkur fókus á breytingastjórnun er lykillinn að árangursríkum verkefnum – ekki bara í tækninni heldur í því að fá fólkið með í ferðalagið

Fyrirlesarar verða,

Ásta Lára Jónsdóttir - Deildarstjóri Verkefnahúss UT

Þröstur Elvar Óskarsson - Verkefnastjóri Verkefnahúss UT

Fréttir

25. október 2024 14:23

Heimsókn í háskóla-, iðnaðar- og nýsköpunarráðuneytið

Við vorum svo heppin að fá boð í heimsókn til HVIN, þar sem Ásdís Halla Bragadóttir ráðuneytisstjóri og Þórir Hrafnsson mannauðsstjóri tóku á móti okkur í nýju og glæsilegu húsi ráðuneytisins að Reykjastræti 6.

Ásdís Halla fór vel yfir það sem þau kalla Stiklur í starfsemi sinni og er leiðarvísir þeirra að árangri fyrir Ísland. HVÍNandinn var ræddur sem leggur áherslu á að samstarfsfólk hjálpist að og vandi sig, viðurkenni mistök og læri af þeim, hlusti, virði og sýni hvert öðru umhyggju, gleðjist og fagni áföngum og viðhaldi heiðarlegum samskiptum. Þau Ásdís Halla og Þórir telja að þetta sé búið að ganga mjög vel og húsið sé eins og hannað fyrir þessi samskipti með opnum rýmum.

Þau fóru einnig vel yfir hvernig verkefni innan ráðuneytisins eru unnin. Þá er verkefnum forgangsraðað og þau bútuð niður og unnin í tímasettum sprettum. Þau beita sýnilegri stjórnun þar sem farið er yfir sprettina einu sinn í viku á töflum sem eru sýnilegar öllum. Með þessari aðferð hefur náðst að ljúka við fleiri verkefni, einnig þau sem alla jafna þurfa að bíða þegar önnur mikilvæg verkefni sem brennur á að ljúka koma fram. Verkefnin eru skilgreind sem þríþætt, sífellu verkefni, tilfallandi verkefni og sprettir. Verkefnin eru eðlilega ólík að stærð og úrlausnir þeirra kalla oft á ólík vinnubrögð. Verklagið stýrir því í hvaða flokk verkefnin fara og stundum geta þau þróast þannig að þau færast á milli flokka.

Starfsfólk ráðuneytisins starfar í þverfaglegum teymum þar sem sérfræðingar frá ólíkum skrifstofum starfa saman og leiða saman einstaklinga sem hafa sérþekkingu á ólíkum sviðum. Að lokum fengum við túr um húsnæðið þar sem einn starfsmaður frá hverri skrifstofu sagði stuttlega frá þeirra verkefnum og uppbyggingu.

Heimsóknin var virkilega skemmtileg og fróðleg, það var gaman að spjalla við starfsfólkið og allir tóku hópnum okkar vel. Við þökkum öllum í HVIN fyrir að gefa sér þennan dýrmæta tíma til að taka á móti okkur og félögum okkar í breytingastjórnunarhópnum.

4. október 2024 12:22

Vettvangsferð í HVIN

Kæru félagar, okkur hefur verið boðið í vettvangsferð til HVIN.

Viðburðurinn verður 22. okt. næstkomandi á milli 8:30-10:00, takmarkaður fjöldi sem kemst að, fyrstir koma fyrsti fá.

Frá stofnun háskóla-, iðnaðar- og nýsköpunarráðuneytisins (HVIN) hefur áhersla verið lögð á breytt vinnubrögð og áherslur í starfsemi ráðuneytisins. Markmiðið var að ná auknum árangri samhliða því að vera sveigjanlegri og hafa fólk í forgrunni allrar ákvarðanatöku, ekki kerfið sjálft.

Til að styðja við þessa áherslu var það forgangsmál hjá HVIN að hafa skýra sýn og sveigjanlegt skipurit sem ýtir undir nýsköpun. Skrifstofum var fækkað og yfirbygging minnkuð. Á sama tíma er áhersla lögð á skipulagningu verkefna þannig að stefnumarkandi mál eru aðskilin almennri stjórnsýslu og rekstrarlegum viðfangsefni. Slík breyting, að hafa skýra forgangsröðun og greina á milli mikilvægra langtímaverkefna og áríðandi daglegra úrlausnarefna, hefur verið lykilatriði í því að starfsfólk ráðuneytisins er ekki fast í viðbragðsstjórnun heldur starfar eftir skýrri stefnumörkun og markmiðum. Þannig hefur HVIN tekist að hrinda stórum breytingum í framkvæmd sem hafa jafnvel verið föst á teikniborðinu um margra ára skeið.

Í heimsókninni mun Ásdís Halla Bragadóttir ráðuneytisstjóri kynna verklagið og hvernig tekist hefur verið á við þau ljón sem hafa verið á veginum.

27. maí 2024 12:42

Aðalfundur faghóps um breytingastjórnun 2024

Aðalfundur faghóps um breytingastjórnun var haldinn 15. maí sl.

Starfsárið 2022-2023 var gert upp, dagskrá komandi árs rædd og kosið í nýja stjórn fyrir starfsárið 2023-2024. Í stjórn á komandi ári verða:

Júlía Þorvaldsdóttir, Þjóðskrá (Formaður)
Ásta Rut Jónasdóttir, Fastus
Brynjar Rafn Ómarsson, Eimskip
Helga Franklínsdóttir, Efla
Gunnlaugur Bjarki Snædal, Isavia

Þökkum fráfarandi stjórnarmeðlimum góð störf .

Stjórn hópsins mun hittast á næstunni og leggja drög af dagskrá starfsársins. Endilega komið áleiðis hugmyndum eða óskum um efnistök ef þið hafið áhuga.

Þökkum öllum meðlimum fyrir þátttökuna starfsárinu sem var að ljúka og hlökkum til þess næsta!

Stjórn

Brynjar Rafn Ómarsson

Verkefnastjóri - Formaður - Eimskip

Gunnlaugur Bjarki Snædal

Verkefnastjóri - Varaformaður - ISAVIA ohf.

Arna Dan Guðlaugsdóttir

Sérfræðingur - Stjórnandi - Sessor