Fréttir og pistlar

Forysta er þekkingarfyrirtæki sem sérhæfir sig í þjónustu við fyrirtæki á sviði markaðsmála, vörumerkjastjórnunar og markaðssamskipta. Forysta í gegnum síðuna Markaðsmenn.is veitir þjónustu í formi ráðgjafar, „Markaðsmanna til leigu“, vörumerkjarýni, námskeiða og fyrirlestra.
Forysta ehf á og rekur vefinn www.markadsmenn.is

Á dögunum sótti ég fyrirlestur á Hilton Hotel í Reykjavík þar sem Mary Flynn, sérfræðingur hjá hinu afburðagóða þjónustu- og upplifunarfyrirtæki Walt Disney sat fyrir svörum. Mary Flynn var spurð að því hvað gerði Walt Disney að svo góðu fyrirtæki. Hún svaraði því til að hjá Walt Disney væri viðskiptavinurinn settur í 3. sæti. Þetta kom mér á óvart! Þetta er ekki það sem við erum vön að predika. En þegar betur var að gáð, og við nánari skýringu, þá small þetta allt saman.
Mary Flynn segir að fyrirtæki þurfi að vera með frábæra leiðtoga sem geri réttu hlutina á réttan hátt. Starfsmenn, sem fá hvatningu frá stjórnanda og frjálsræði í að taka frumkvæði, hafi mun meira sjálfsöryggi sem aftur leiðir til ánægju hjá starfsmönnum sem smitast beint til viðskiptavina.
Íslenska gámafélagið hefur verið valið fyrirtæki ársins tvö ár í röð, sem staðfestir það að starfsfólki okkar líður vel í vinnunni og er stolt og ánægt með starfsandann. Sá starfsandi sem mótast hefur hjá Íslenska gámafélaginu skapast m.a. af virkri þátttöku allra starfsmanna í ýmsum atburðum á vegum fyrirtækisins en flestir þeirra lúta að því að virkja maka og fjölskyldu starfsmanna. Við lifum eftir heimspeki fisksins (e. Fish philosphy) og gengur hugmyndafræðin út á að velja sér viðhorf, vera til staðar fyrir samstarfsmenn og viðskiptavini, gera daginn eftirminnilegan og að leika sér.
Ég gæti vaknað á morgnana og valið það að vera í fúlu „ruslaskapi“ en ég vel að hlakka til að hitta mína samstarfsmenn, ég hef gaman af því sem ég tekst á við hverju sinni, horfi á ný tækifæri og vinn úr ábendingum sem geta gert mig og mitt fyrirtæki enn betra. Ég stefni ávallt að því að vera framúrskarandi. Undanfarin ár höfum við lagt fyrir viðskiptavini okkar þjónustukönnun og er niðurstaðan ótvíræð og staðfestir einnig þau fræði að með ánægðum starfsmönnum skapast ánægja meðal viðskiptavina.

Agnes Gunnarsdóttir, framkvæmdastjóri sölu- og markaðssviðs Íslenska gámafélagsins.
ERGO=>1. sterk forysta =>2. ánægðir starfsmenn =>3. ánægðir viðskiptavinir og töfrar gerast

Stjórnvísifélagar fengu góðar móttökur í nýjum húsakynnum Vendum í morgun þar sem boðið var upp á rauðgrænan melónukokteil. Alda Sigurðardóttir varpaði fram spurningunni: "Hver er tilgangurinn með því að efla áhuga og eldmóð í starfi". Margvísleg svör komu t.d. að tilgangurinn væri að koma í veg fyrir kulnun, auka árangur, minnka veikindi, auknar nýjungar koma fram, samvinna, óttaleysi og að fá meira út úr starfinu. Það sem fær okkur til að mæta í vinnuna er starfshvatningin. Starfshvatningin er hlesti áhrifaþáttur varðandi frammistöðu og árangur. Sigrún Þorleifsdóttir fræddi fundinn um helstu hvatakenningarnar Vitales (1953) sem tengdi saman hugtökin "performance" og "motivation". Það skiptir ótrúlega miklu máli að vita til hvers er ætlast af okkur í starfi. Einnig kynnti Sigrún þarfakenningar Maslow, XY kenningar McGregor og markmiðakenningu Lockers.

Unnur Valborg sló botninn i fundinn. Hún fór m.a. yfir mikilvægi þess að stjórnendur setji sér skrifleg skýr markmið sem þeir fara yfir reglulega t.d. með öðrum stjórnanda til þess að skuldbinda sig til að klára verkefni.
Myndir af fundinum má sjá hér:
http://tinyurl.com/5vslqtj

Gæðastjórnun er fyrir viðskiptavin

Eitt öflugasta hjálpartæki stjórnenda eru ISO gæðastjórnunarstaðlarnir. Þegar kröfustaðallinn 9001 er skoðaður sést að kröfurnar sem þarf að uppfylla snerta alla helstu þætti sem vel rekin fyrirtæki þurfa að huga að og vakta. Allar kröfurnar lúta að einu markmiði; að uppfylla kröfur og væntingar viðskiptavina.

Margir spyrja sig hvort innleiðing gæðastjórnunar þurfi að auka skriffinnsku og flækju. Sumir ganga svo langt að segja að hún sé ekki ómaksins virði. Meiri pappír, aukið flækjustig, íþyngjandi ákvarðanataka og fleira er dregið fram til að hafa afsökunina nógu sterka. Svar mitt er að flækjan minnkar og reksturinn verður auðveldari vegna þess að skipulagið verður betra. Það þarf hins vegar að skrá það sem skiptir máli. Þær upplýsingar, sem hafa ef til vill ekki verið aðgengilegar, verða það. Jákvætt ekki satt?

Stundum er afsökunin sú að það kosti of mikið að koma gæðastjórnun á og innleiða svokallað gæðakerfi. Það er auðvelt að halda utan um þann kostnað sem hægt er að færa á gæðakerfi, en það erfiðara er að sjá í beinum tekjum hverju það skilar. Veltum fyrir okkur hvað mistök geta kostað við búnað eða öryggi; hvað það kostar að missa viðskiptavin vegna þess að hann er ekki ánægður með þjónustuna; hvaða þýðingu það hefur fyrir rekstur fyrirtækisins að fá fleiri viðskiptavini. Það þarf ekki mikið ímyndunarafl til að sjá að viðskiptavinir koma frekar til fyrirtækis sem stendur sig vel og er þekkt af vönduðum vinnubrögðum.

Það þarf ekki að vera flókið né kostnaðarsamt að koma á gæðastjórnun hjá fyrirtæki sem er tilbúið að fylgja og innleiða kröfur til starfseminnar. Fyrst af öllu þarf þó eitt skilyrði að vera uppfyllt; stjórnendur og starfsmenn verða að vilja og vera staðráðnir í að veita viðskiptavinum góða þjónustu.

Guðmundur S. Pétursson,
gæðastjóri Landsvirkjunar

Hér má sjá myndir frá glæsilegri afmælisráðstefnu Stjórnvísi.
http://tinyurl.com/697ysby

Kæru félagsmenn í Stjórnvísi,
velunnarar,
háttvirtu fyrirlesarar,
góðir ráðstefnugestir.

TIL HAMINGJU MEÐ DAGINN.

Þetta er fallegur dagur; merkisdagur í sögu félagsins. 25 ára.
Það er ástæða til að fagna slíkum tímamótum með góðri afmælisráðstefnu. Enda segjum við að þessi ráðstefna sé blanda af fræðum og fögnuði. Við höfum fengið til liðs við okkur góða fyrirlesara:

Brynju Guðmundsdóttur, forstjóra Gagnavörslunnar.
Árna Odd Þórðarson, forstjóra Eyris fjárfestingarfélags og stjórnarformann Marels.
Guðnýju Rósu Þorvarðardóttur, framkvæmdastjóra Parlogis
og síðast en ekki síst Tómas Má Sigurðsson, forstjóra Alcoa á Íslandi og formann Viðskiptaráðs.

Horft verður til framtíðar í fyrirlestrum dagsins.

Yfirskriftin er:
Ísland 2015 - forgangsverkefni stjórnandans.

Vonandi verður framtíðarsýnin og Ísland árið 2015 blanda af fræðum, framtakssemi og fögnuði.

Stjórnvísi hét upphaflega Gæðastjórnunarfélag Íslands og það var einmitt í tíð Guðrúnar Ragnarsdóttur sem formanns félagsins sem nafninu var breytt í Stjórnvísi.

Það er mikill heiður að Guðrún, sem er framkvæmdastjóri Lánasjóðs íslenskra námsmanna, flytji hátíðarávarp þessarar afmælisráðstefnu.

Góðir gestir!

Það er í sjálfu sér enginn munur á gæðastjórnun og venjulegri stjórnun. Venjuleg stjórnun á að vera gæðastjórnun. Stjórnun snýst um aga, virðingu og gæði.

Oft er spurt:

Hvað er Stjórnvísi?
Stjórnvísi er félag þar sem kjarnastarfið fer fram í fjölda faghópa á hinum ýmsu sviðum stjórnunar.

Stjórnvísi fæst við nýjustu stefnur og strauma í stjórnun - og af því leiðir að tengslin við háskólasamfélagið og fyrirtækin í landinu eru mikil.

Stjórnvísi er líka félag sem stendur fyrir almennum ráðstefnum, viðburðum og verðlaunum um stjórnun.

Á síðasta starfsári voru haldnar átta ráðstefnur og fluttu 135 fyrirlesarar erindi á ráðstefnum og fundum faghópa - og voru gestir yfir 2.600 talsins á viðburðum félagsins.

Stjórnvísi er stærsta stjórnunarfélag á Íslandi með yfir 1.200 félagsmenn og innan raða þess eru núna yfir 240 fyrirtæki.

Stjórnvísi er áhugamannafélag í eigu félagsmanna og starfar ekki með fjárhagslegan ágóða í huga.

Félagið er opið öllum sem hafa áhuga á stjórnun; eins og stjórnendum, sérfræðingum, nemendum og öðrum áhugamönnum um stjórnun.

Ég hef stundum sagt að starfið í faghópum félagsins lyfti hinum venjulega starfsdegi félagsmanna upp í hærri hæðir.

Faghópafundur að morgni sem byrjar á heimsókn í fyrirtæki þar sem sérfræðingar þess miðla af góðum vinnubrögðum í stjórnun með raunverulegum dæmum er ekki aðeins byrjun á góðum degi - heldur þekking sem smitar út frá sér þegar félagsmenn koma „heim til vinnu“ í sínum fyrirtækjum.

Stjórnun og rekstur fyrirtækja er ekki eitthvað sem er endanlegt - það er viðfangsefni hvers dags. Vegna þess að stjórnun snýst um fólk og mannlega þætti.

Við erum ekki búin til úr stáli og steypu - þótt við séum auðvitað heilsteypt. Í okkur rennur blóð - og við höfum tilfinningar sem koma fram í daglegum samskiptum á vinnustöðum; góðum sem slæmum.

Þegar ég var ráðstefnustjóri á stórri ráðstefnu hjá Gæðastjórnunarfélaginu fyrir nákvæmlega nítján árum undirbjó ég mig m.a. með því að spyrja hárskerann minn að því hvað gæðastjórnun væri.

Ræðir maður ekki alltaf við hárskerann sinn.

Hann svaraði: Ég veit ekki nákvæmlega hvað þetta gæðastjórnun er: En ég veit það eitt að góð stjórnun felst í að ráða gott fólk - þá sparar maður sér vandræði, mistök, kvartanir og tímasóun við að gera hlutina upp á nýtt.

Þetta voru vísindi á einföldu máli.

Gleymum því aldrei að góð stjórnun er ekki fyrir þann sem stjórnar - heldur fyrst og fremst fyrir kröfuharða viðskiptavini.

Veislugestir góðir.

Margir hafa komið að undirbúningi þessarar ráðstefnu. Afmælisnefnd félagsins skipulagði dagskrána hér í dag í samvinnu við stjórn. Hún ýtti verkefninu úr vör.

Í afmælisnefndinni voru Margrét Reynisdóttir, fyrrverandi formaður Stjórnvísi, Ásta Malmquist og Sólveig Hjaltadóttir.

Í undirbúningi þessarar ráðstefnu hefur þó mest mætt á framkvæmdastjóra félagsins, Gunnhildi Arnardóttur.

Ég þakka þeim þeirra þátt.

Góðir gestir.

25 ára afmælisráðstefna Stjórnvísi er sett og gefum afmælisbarninu hressileg lófaklapp.

höfundur og flytjandi: Jón G. Hauksson, formaður stjórnar Stjórnvísi 2011

Stjórnvísi fagnar í dag 25 ára afmæli félagsins. Í tilefni afmælisins er öllum félögum og velunnurum Stjórnvísi boðið á afmælisráðstefnuna.

Afmælisráðstefna Stjórnvísi, sem er stærsta stjórnunarfélag á Íslandi með yfir 1200 félagsmenn verður haldin milli kl. 16:00 og 19:00 hinn 27. október nk. í Natura, nýjum ráðstefnusal Icelandair Hótel Reykjavík Natura við Reykjavíkurflugvöll; gamla Loftleiðahótelinu.

Þema hátíðarinnar er Ísland 2015 - forgangsverkefni stjórnandans.
Fyrirlesarar eru:

Tómas Már Sigurðsson, forstjóri Alcoa á Íslandi
Brynja Guðmundsdóttir, forstjóri Gagnavörslunnar
Árni Oddur Þórðarson, forstjóri Eyris og stjórnarformaður Marels
Guðný Rósa Þorvarðardóttir, framkvæmdastjóri Parlogis

Ráðsefnustjóri er Jón G. Hauksson formaður stjórnar Stjórnvísi og ritstjóri Frjálsrar verslunar.

Hátíðarávarp flytur Guðrún Ragnarsdóttir, framkvæmdastjóri LÍN. Guðrún var formaður Stjórnvísi 2000-2002

Iðnaðarráðherra Fr.Katrín Júlíusdóttir heiðrar fyrrverandi formenn Stjórnvísi

Allir félagsmenn í Stjórnvísi eru hvattir til að mæta á afmælisráðstefnuna sem verður hin glæsilegasta, blanda af fræðum, fögnuði og léttum veitingum.

Krafan um árangur í ríkisrekstri
Þegar ákveða á fjárveitingar til verkefna ríkisins þarf að meta með faglegum hætti þörfina á þjónustunni og setja fram skýrar kröfur um árangur. Grunnur að farsæld samfélags er fagleg stjórnsýsla sem nýtur trausts. Til þess að svo megi verða þarf m.a. að tryggja að allir hafi aðgang að lykilupplýsingum um starfsemi ríkisins.
Í nýútkominni skýrslu „Samræmt yfirlit um hlutverk og árangur í ríkisrekstri“ er sett fram hugmynd í þessum anda. Markmið yfirlitsins er að Alþingi, yfirstjórn ráðuneyta, stjórnendur stofnana og almenningur, hafi samræmdar upplýsingar til að meta mikilvægi og árangur verkefna ríkisins. Með því er verið að auka á gegnsæi í ríkisrekstrinum og auka aðhald. Einnig að opna á virkari viðbrögð almennings og gagnvirkari samskipti við hagsmunaaðila ráðuneyta og stofnana. Það eykur líkur á því að verkefnum verði forgangsraðað eftir mikilvægi.
Í skýrslunni er birt hugmynd að samræmda yfirlitinu. Þar er fyrst gert ráð fyrir að birt sé stutt lýsing á hlutverki og meginverkefnum stofnunar og tenging við lög og stefnu. Sérstaklega eru síðan birtar lykilupplýsingar um fjármál, starfsmenn og viðskiptavini. Viðhorf starfsmanna gefa góða vísbendingu um stöðu stofnunar. Viðskiptavinirnir gefa upplýsingar um mat þeirra á núverandi þjónustu og benda á það sem betur má fara. Slíkar upplýsingar leiða til úrbótaverkefna. Krafa er gerð um viðvarandi endurmat og úrbætur til hagkvæmari reksturs, þannig að fjármunum verði betur varið í samræmi við mikilvægi þjónustunnar.
Ljóst er að ekki verða breytingar á þessu sviði nema Alþingi og framkvæmdavaldið taki ákvörðun um slíkt eins og gert var með lögum um fjárreiður ríkisins (88/1997).
Þorvaldur Ingi Jónsson, viðskiptafræðingur, Ms í stjórnun- og stefnumótun.
Hægt er að nálgast skýrsluna hér: http://stjornvisi.is/skjol/Samraemt_yfirlit_um_hlutverk_og_arangur_i_rikisrekstri.pdf

Snjólfur Ólafsson hóf fyrirlestur sinn á heimspekilegan hátt í morgun með því að útskýra að hugtak og orð væru ekki það sama. Hugtök þurfa að vera skýr til að vera gagnleg. Orðið stefna er notað um margt en hugtakið stefna er lýsing á þeim ávinningi sem stefnt er að (markmiðum) og hvernig ávinningnum er náð (leiðum).
Stefnumótun felur í sér að breyta þessari lýsingu sem stefnt er að og hvernig ávinningi skuli náð.
Framkvæmd stefnu. Stundum felst breyting á lýsingum í því að útfæra stefnu. En hvernig er stefnu lýst? Oftast með orðum eða myndum. Kaplan og Norton mæla með því að lýsa stefnu með stefnukorti. Það er ekki það sama að stefna sé skýr og að hún sé ekki sveigjanleg. Dæmi: Það gæti verið mjög skýrt að 20% af tíma allra á ákveðnum vinnustað nýtist í íþróttir. Víddir hjálpa okkur að gleyma engu í stefnumótunarvinnunni og eru nokkurs konar gátlistar. Dæmi um víddir eru fjármál-þjónusta-starfsmenn.
Hvernig fer stefnumótun fram? Aðallega á stefnumótunarfundum og með einstökum stefnumótandi ákvörðunum. Sumir framkvæmdastjórnarfundir eru stefnumótunarfundir. Oft eru margar stefnur í gangi innan sama fyrirtækis. Þá er ein yfirstefna og síðan margar undirstefnur, gæðastefna, starfsmannastefna o.fl. En um hvað snýst stefnumótun? Hún snýst um að svara þeirri spurningu: Hvernig viljum við vera í framtíðinni. Hvað ætlum við að gera og leggja áherslu á. Við eigum líka að spyrja okkur spurninga eins og „Hvernig viljum við skilgreina okkur á markaðnum? Eigum við að þróa tiltekna vöru? Eigum við að herja á nýjan markað?
Í stefnumótun er nauðsynlegt að greina stöðuna, það er þó ekki eiginleg stefnumótun. Stefnumótun er ótrúlega ólíkt unnin og fer eftir hvernig stofnunin/fyrirtækið er. Sumir vita allt um markaðinn, aðrir ekki neitt og þurfa því að byrja á að gera PESTEL. Stefnumótun er alltaf á ábyrgð þeirra sem eru yfirstjórnendur.
Það sem kemur svo út úr stefnumótunarvinnunni er: 1. Aðgerðalisti/verkefnalisti sem mikilvægt er að forgangsraða 2. Skýr meginatriði stefnunnar 3. Ákvarðanir.
myndir af fundinum sem var haldinn í Gimli HÍ þann 27.október af faghópum um BSC og Stefnu, mótun og framkvæmd : http://tinyurl.com/69ju8lz

Faghópur um gæðastjórnun hélt fund í morgun í húsakynnum HugarAx. Katrín Rögn gæðastjóri HugarAx sagði frá því að gæðakerfi þeirra byggir á gæðakerfum þriggja fyrirtækja: EJS, Hugar og Ax. HugurAx stefnir að vottun svk.ISO 9001 og taka mið af ISO/IEC 27001 um öryggi í upplýsingatækni. Þau eru með úttektir 2svar á ári og er markmið Katrínar Ragnar að hrífa fólkið með sér. Skjalakerfið heitir „Skjalavörður“ og er styrkleiki kerfisins hve leitin er einföld og allt er „Geymt en ekki gleymt“.
Björn E. Baldursson frá Rafskoðun ehf útskýrði að faggilding væri formleg viðurkenning þar til bærs stjórnvalds á því að aðili sé hæfur til að vinna tiltekin verkefni varðandi samræmismat. Skoðun er hins vegar mæling eða skoðun til samanburðar við tilgreindar kröfur sbr. Skoðun á bíl. Rafskoðun var stofnað 1993 og eru helstu viðskiptavinir orkufyrirtækin og Mannvirkjastofnun. Rafskoðun staðfestir og tryggir að starfsfólk búi yfir nægjanlegri reynslu og þekkingu til að framkvæma þá verkþætti sem þeim er ætlað, á réttun hátt, í réttu umhverfi og með réttum tækjabúnaði. Rafskoðun er með skoðanir og faggilda starfsemi á
• Háspennuvirkjun
• Neysluveitum
• Öryggisstjórnunarkerfum rafveitna og rafvirkja
Hans-Olav Andersen eigandi Tröð, arkitektastofu kynnti starfsemi fyrirtækisins en Tröð hefur unnið fjölda samkeppna og hannaði m.a. Barnaspítala Hringsins, grafreitinn í Fossvogi, ýmis atvinnuhúsnæði, þjónustumiðstöðvar o.fl. Tröð fékk votun á ISO 9001 á árunum 2006-2011. ISO vottunin hefur eflt reksturinn, samningagerð er markvissari, betri samskipti við verkkaupa og betri starfsmannastjórnun.
Smelltu hér til að sjá myndir
http://tinyurl.com/5wz66ko

Sigrún Jóhannesdóttir hitaði all skemmtilega upp hjá faghópafundi um Sköpunargleði sem haldinn var hjá Umferðastofu sl. fimmtudag. Munurinn á að hugsa lárétt og lóðrétt er sá að yfirleitt þegar við hugsum förum við beint í lóðrétta hugsun sem er reynslubankinn okkar. Þegar við hugsum lóðrétt brjótum við heilann og förum út fyrir kassann. Til þess að hita upp og þjálfa lóðrétta hugsun lagði Sigrún nokkrar þræl erfiðar gátur fyrir fundinn sem fengu okkur til að fara út fyrir rammann þ.e. vernjulega reynslubankann.
Það voru þeir Gísli S. Brynjólfsson og Gunnar Þór Arnarson framkvæmdastjórar Hvíta hússins sem fóru yfir ferlið hvernig auglýsing verður til. 1. Markmið þurfa að vera mjög skýr 2. Allar hugmyndir koma til greina 3. Val á endanlegri hugmynd.
Þegar verið er að vinna með auglýsingu er spurt spurninga eins og:
Hvað gerir okkar vöru öðruvísi og betri?
Hvaða galla hefur varan?
Hvaða tækifæri hefur varan?
Á varan sögu?
Hvaðan kemur hráefnið í vöruna?
Hvernig bregst varan við erfiðri stöðu?

Hér má sjá myndir af fundinum

http://www.facebook.com/media/set/?set=a.217215248346433.54856.110576835676942&type=3

Árangursrík mannauðsstjórnun skapar samkeppnisforskot
Sífellt verður erfiðara fyrir skipulagsheildir að öðlast samkeppnisforskot. Það að búa yfir samkeppnisforskoti er eftirsóknarvert þar sem það gerir að verkum að skipulagsheild heldur viðskiptavinum sínum sem leiðir til hagnaðar. Það laðar að sama skapi að hæfileikaríkt starfsfólk sem drífur áfram þjónustu, gæði og framleiðni (Fitz-enz og Phillips, 1998). Ástæðan fyrir því að erfiðara er að öðlast samkeppnisforskot í dag en áður er sú að aðgengi að auðlindum og upplýsingum er nánast hið sama. Lykillinn að árangri felst því í að búa yfir sérfræðiþekkingu sem ógerlegt er að líkja eftir. Skipulagsheildir með samkeppnisforskot, búa yfir slíkri óáþreifanlegri þekkingu (Nonaka, 1991). Til að skara fram úr og öðlast varanlegt samkeppnisforskot þarf auk þess að vera til staðar stefnumiðaður ásetningur. Stefnumiðaðar ásetningur felst í því að starfsmenn eru drifnir áfram af eldmóði og sérstökum tilgangi í að ná háleitum markmiðum fyrir skipulagsheildina (Hamel og Prahalad, 1989). Í ljósi kenninga um að leynd þekking hvers fyrirtækis sé lykillinn að samkeppnisforskoti (Nonaka 1991) hefur aukin athygli beinst að mannauðnum. Þetta viðhorf endurspeglar fjárhagslegar væntingar (Fitz-enz og Davison, 2002). Ef fólk er raunverulega eina rótin af viðvaranlegu samkeppnisforskoti, Þá skiptir öllu máli hvernig þessari auðlind er stjórnað (Kearns, 2002).
Tekið úr MS ritgerð Ingu Guðrúnar Birgisdóttur,,Samþætting mannauðsstefnu og viðskiptastefnu: Árangursmælikvarðar sem stjórntæki“, jan. 2006

Faghópur um EFQM/CAF hélt einstaklega áhugaverðan fund í morgun þar sem kynntur var ávinningurinn af notkun EFQM.
Myndir af fundinum má sjá á eftirfarandi slóð: http://www.facebook.com/photo.php?fbid=216978278370130&set=a.216978201703471.54757.110576835676942&type=1&theater
Sigrún Ósk aðstoðarforstjóri ÁTVR kynnti stefnu fyrirtækisins sem er að vera í hópi fremstu fyrirtækja landsins. ÁTVR byrjaði að vinna með EFQM árið 2002 og hlaut Íslensku gæðaverðlaunin árið 2004 sem byggjast á líkaninu. Þar er verið að meta framkvæmdaþætti og árangursþætti. ÁTVR hefur unnið mat reglulega síðan með 5-6 manna stýrihóp sem 27 starfsmenn tóku þátt í hvert skipti auk utanaðkomandi ráðgjafa. Metin er forysta, stefnumörkun, starfsmenn, ánægja viðskiptavina, ánægja starfsmanna, samfélagslegur árangur, lykilárangur, ferli vöru, þjónusta, samstarf og auðlindir. Balanced scorecard er notað til að styrkja niðurstöður.
ÁTVR skoðar alla 9 þættina út frá þremur víddum (CSR), félags-umhverfis-og efnahagslegum þáttum. Í kjölfar sjálfsmatsins er markvisst unnið með tillögur og niðurstöður. Stefnumótun er unnin til 3ja ára. Með líkaninu er horft markvisst á þróun starfsmanna út frá markaðri stefnu og skýrum markmiðum. Reglulegt mat á aðferðum og árangri tryggir að stöðugt er tekið til athugunar hvað má betur fara.
Sigurjón Þ. Árnason, Tryggingastofnun ríkisins sagði að CAF væri útbreiddasta matslíkan hjá stjórnsýslu Evrópu. Líkanið er notað alls staðar í heiminum, gæðastarf klárast aldrei og er langhlaup. Markmið CAF er að kynna stjórnsýslunni altækar gæðareglur. Framkvæma eigið sjálfsmat og endurbæta til að verða betri og betri. PDCA - plan-do-check-act. CAF stendur fyrir Common Assessment Framework. Líkanið skiptist í 5 einingar og hver eining skiptist í fleiri alls 28. Fyrir hverja einingu er gefið til kynna með spurningu hvað þurfi að vera til staðar.
Með því að nota sjálfsmat er verið að horfa í spegilinn á raunsæjan hátt og heiðarlegan og ekki hægt að fela sig gagnvart starfsmönnum. Samskiptin verða opin, þú veist hvar þú byrjar en ekki hvar þú endar og allir sjá framfarir. Óþægileg uppgötvun er líkleg en þú losnar við það sem hefur angrað þig. CAF hefur aðallega verið notað fyrir stjórnsýsluna og EFQM fyrir einkafyrirtækin. Í dag eru yfir 200 notendur af líkaninu.
Þessi tvö matslíkön hjálpa til við að fá raunhæft mat. www.caf.eu

Fólk fær í vöggugjöf ýmsa hæfileika en ólíklegt má telja að nokkur fæðist fullkominn stjórnandi. Jafnvel þeir sem afla sér stjórnunarmenntunar hafa enga tryggingu fyrir því að þeir nái árangri sem stjórnendur. Peter Drucker hélt því fram að þó fólk geti lært árangursríka stjórnun þá sé ekki hægt að kenna hana.
Fólk sem er að stíga sín fyrstu skref sem stjórnendur upplifir ýmsar áskoranir. Það ber ekki aðeins ábyrgð á sjálfu sér heldur þarf að útdeila verkefnum til annarra og bera ábyrgð á frammistöðu þeirra. Hugsa þarf lengra fram í tímann, móta stefnu, framtíðarsýn og setja markmið. Jafnvel þarf fólk að hætta sér inn á það jarðsprengjusvæði að stjórna fyrrum jafningjum. Ef fólk hefur ekki unnið sig upp innan fyrirtækisins er það samhliða þessu að kynnast nýju fólki og nýrri menningu á nýjum vinnustað.
Nýir stjórnendur sem fá tækifæri til að vinna með markþjálfa geta aukið mjög líkur sínar á að ná góðum árangri, jafnvel á stuttum tíma. Bæði aukast líkur á að þeim takist að forðast algeng byrjendamistök og líkur á að þeir læri af mistökum sínum. Markþjálfi getur veitt stjórnanda stuðning við að koma auga á og nýta styrkleika sína til að takast á við nýtt hlutverk og við að setja markmið, móta aðgerðir og koma þeim í framkvæmd.
Vitnisburður nýrra stjórnenda sem hafa unnið með markþjálfa staðfestir að þeim hefur tekist að efla sjálfstraust, gera fundi skilvirkari, eiga árangursríkari samskipti, veita skilvirkari endurgjöf og spara dýrmætan tíma sem telur hundruð klukkustundir á ári. Þeir meta það mikils að geta rætt við hlutlausan aðila sem þeir geta treyst. Sumir telja að án aðstoðar markþjálfa hefðu þeir gefist upp í nýju hlutverki og hætt störfum. Það getur verið tímafrekt og kostnaðarsamt að ráða og þjálfa nýja stjórnendur og því er mikið í húfi að vel takist til. Það gerir markþjálfun áhugaverðan valkost fyrir nýja stjórnendur.
Sigrún Þorleifsdóttir, stjórnendaþjálfari hjá Vendum ehf.

Jón Halldórsson framkvæmstjóri sölusviðs Olís bauð Stjórnvísifélaga velkomna í glæsileg húsarkynni eins elsta starfandi félags landsins Olís sem var stofnað 1927. Það kom mörgum á óvart að Olís er ekki eingöngu í orkusölu, þeir selja mikið til útgerðarinnar í landinu og reka verslunina Ellingsen og fyrirtækið Hátækni.

Jóhann Örn Ólafsson kynningarstjóri Bylgjunnar sagði okkur frá því að Bylgjulestin er búin að vera að ferðast um landi með það að markmiði að kynna hátíðir bæjarfélaganna. Bylgjan og Olís voru núna í sumar að fara fjórða árið í röð í sumarsamstarf. Sveppi sem er vinsælasta barnastjarna landsins var verður andlit Olís í þessum leik næstu tvö árin. Hemmi Gunn og Svansý eru á vaktinni á laugardögum á Bylgjunni og kynna gluggaleikinn sem felst í því að bæjarbúar setja Bylgjumiða í gluggann hjá sér þar sem Bylgjulestin er stödd og Svansý fer síðan og velur hús með miða. Bylgjan hefur merkt að hlustun hafi haldist stöðug og góð (mælingar frá Capacent) frá því sumarleikurinn með Olís hófst en hlustun átti það til að detta niður á sumrin.

Sigurður Pálsson (Diddi) forstöðumaður markaðssviðs Olís kynnti að í 18 ár hefur Olís verið með sumarleiki fyrir börn. Sumarleikurinn hófst með því að gefin var út bók fyrir krakka um hann Olla og í þeirri bók var einfaldur stimpilleikur. Stimpilleikurinn hefur breyst á þessum 18 árum og þróast. Vinningarnir eru núna hluti af vöruúrvali og hefur einfaldast mjög mikið. Leikurinn höfðar til fólks á öllum aldri því vikulega eru dregnar út úttektir á eldsneyti, vildarpunktar o.fl.

Áskorun Olís með tryggðarleiknum felst í að sannfæra viðskiptavininn um að koma inn á sínar stöðvar og það hefur tekist. Á þessu ári var skilað inn 20þús.fullstimpluðum kortum og afhentir 175.000þús. stimpilvinningar. Viðskiptavinir Olis eru þeir ánægðustu af Olíufélögunum þar sem boðið er upp á þjónustu skv. Íslensku ánægjuvoginni.

Myndir af fundinum: http://www.facebook.com/media/set/?set=a.215976691803622.54548.110576835676942&type=3

Þegar fasteign er metin er best að vanda til verka. Hvert herbergi er skoðað í krók og kima. Skápar og hillur eru opnuð, umhverfið kannað og kallað eftir ýmsum gögnum. Jafnvel fenginn sérfræðingur til aðstoðar.

Þegar meta á gæðastarf hjá fyrirtæki eða stofnun þarf líka að vanda til verka og skoða allar rekstrareiningar.

Flest lönd nota matslíkön, sem lýsa allri starfsemi, til að fá sem heilstæðast mat. Er þessi aðferð talin til bestu starfshátta. Hluti slíks líkans byggir á spurningum fyrir hvern rekstrarþátt sem gefa til kynna hvað þarf að vera til staðar til að ná sem bestum árangri.

Mest notaða matslíkan hjá fyrirtækjum í Evrópu nefnist EFQM líkanið og kemur frá „European Foundation for Quality Management“. Sambærilegt líkan fyrir stjórnsýsluna nefnist CAF líkanið (Common Assessment Framework) frá EIPA (European Institite of Public Administration). EFQM matslíkanið hefur lengi verið notað af fyrirtækjum og stofnunum á Íslandi. Hjá stjórnsýslu Evrópubandalagslanda er stuðst við CAF matslíkanið. Ennfremur er stuðst við það í stjórnsýslu margra annarra landa m.a. Noregs, Sviss,Tyrklands, Kína og Rússlands. Hafin er notkun á CAF matslíkani á Íslandi.

CAF líkanið byggir á EFQM líkaninu og eru þau nánast eins upp byggð en spurningarnar undir hverjum þætti eru ólíkar. Áherslan í spurningum EFQM matslíkansins höfðar til fyrirtækja en CAF til stjórnsýslunnar. Stjórnvísi veitti gæðaverðlaun þar sem EFQM matslíkanið var notað til að meta hvaða fyrirtæki eða stofnun stæði sig best á sama hátt og tíðkast í Evrópu. Verðlaunin virkuðu hvetjandi á fyrirtæki til að endurskoða og bæta starfshætti sína. Spennandi verður að fylgjast með hvaða áhrif CAF líkanið mun hafa á starfshætti íslenskrar stjórnsýslu.

Sigurjón Þór Árnason
Gæðastjóri Tryggingastofnunar

Kæru félagsmenn í Stjórnvísi.

Það er mjög ánægjulegt hve starfið í Stjórnvísi fer vel af stað í faghópum félagsins og þakka ég ykkur sérstaklega fyrir það.

Það er margt framundan hjá félaginu og faghópum.

Mig langar sérstaklega til að vekja athygli ykkar á 25 ára afmælisráðstefnu Stjórnvísi sem haldin verður milli kl. 16:00 og 19:00 hinn 27. október nk. í Natura, nýjum ráðstefnusal Icelandair-hótelsins við Reykjavíkurflugvöll; gamla Loftleiðahótelinu.

Þema ráðstefnunnar verður Ísland 2015 - forgangsverkefni stjórnandans.

Ráðstefnan er hugsuð sem framtíðarsýn á forgangsverkefni stjórnenda í íslensku atvinnulífi á næstu árum.

Ég hvet alla félagsmenn í Stjórnvísi til að mæta á ráðstefnuna sem verður hin glæsilegasta - en hún verður jafnframt 25 ára afmælishátíð félagsins.

Þetta verður sambland af fræðum og fögnuði.

Þekktir forstjórar úr atvinnulífinu halda fyrirlestra, fyrrrandi formenn Stjórnvísi verða heiðraðir, flutt verður hátíðarræða - auk þess sem boðið verður upp á skemmtiatriði og léttar veitingar þegar líða tekur á ráðstefnuna.

Sjáumst á þessari glæsilegu afmælisráðstefnu eftirmiðdaginn 27. október.

Með kveðju,
Jón G. Hauksson, formaður Stjórnvísi.

Mannlíf í miklum blóma
Á Akranesi er mannlíf í miklum blóma. Íbúar á Akranesi hafa aldrei verið fleiri og bærinn stækkar ört. Akranes er friðsæll og fallegur bær þar sem fjölskyldur geta búið sér sitt framtíðarheimili. Á Akranesi er einstaklega fjölskylduvænt og öruggt umhverfi þar sem áhersla er lögð á mikla og vandaða þjónustu við íbúa. Öflugt atvinnulíf sem býður upp á örugg störf á margvíslegum vettvangi, ásamt húsnæði á góðu verði, hefur orðið til þess að sífellt fleiri kjósa að búa á Akranesi. Menntun skiptir miklu máli og á Akranesi eru menntastofnanir í hæsta gæðaflokki eins og sannaðist svo vel þegar Grundaskóli á Akranesi fékk fyrstur grunnskóla Íslensku menntaverðlaunin. Leikskólar og framhaldsskóli eru einnig reknir af sama metnaði og grunnskólarnir. Á Akranesi er mikið og öflugt íþróttastarf og aðstaða til íþróttaiðkunar með því besta sem þekkist á Íslandi.

Sensa er þjónustufyrirtæki með sérfræðiþekkingu í netlausnum (e. Networking). Áhersla er lögð á að uppfylla sífellt vaxandi þörf íslenskra fyrirtækja og stofnana fyrir samskiptahætti og leiðir, sem uppfylla kröfur um áreiðanleika, öryggi og afköst.

Árangur í samkeppni byggir ekki síst á áreiðanlegum, skjótum og sveigjanlegum aðgangi að upplýsingum og öruggum samskiptum. Þróunin sýnir að samstreymi (e. Convergence) upplýsinga á hvaða formi sem er (t.d. tal, mynd, „gögn”) og lausnir sem að því snúa, eins og t.d. IP símalausnir, eru þegar orðin veigamikill þáttur í góðum árangri. Innra- og ytra netkerfi fyrirtækja skipa lykilhlutverk í að tryggja að svo megi vera.

Netkerfið og þær lausnir sem að því snúa, skila ekki hámarksárangri, sama hve miklu er varið í vél- og hugbúnað kerfisins, ef ekki er til staðar mikilvægur hlekkur; sérfræðingur í netlausnum, sem með þekkingu og reynslu tryggir að heildin vinni vel saman og hámarksárangur er tryggður.

Nýherji er eitt öflugasta upplýsingatæknifélag landsins en það hóf starfsemi sína þann 2. apríl 1992 með samruna IBM á Íslandi hf. og Skrifstofuvéla-Sund hf. Stofnendur voru IBM í Danmörku, Draupnissjóðurinn, Vogun hf., Óli Kr. Sigurðsson og nokkrir stjórnendur IBM á Íslandi.

IBM á Íslandi stofnað árið 1967

Þrátt fyrir ungan aldur á fyrirtækið sér djúpar rætur í íslensku viðskiptalífi. Forsaga Skrifstofuvéla-Sund hf. hófst t.a.m. árið 1899. Saga IBM á Íslandi hf. hófst með stofnun Skrifstofuvéla hf. árið 1946 en stofnandinn var Ottó A. Michelsen. Árið 1949 urðu Skrifstofuvélar hf. einkaumboðsaðili fyrir IBM hér á landi. IBM á Íslandi hf. var síðan stofnað sem sérstakt fyrirtæki í eigu IBM árið 1967. Skrifstofuvélar lögðu til helming af sínu starfsfólki og var Ottó A. Michelsen forstjóri fyrirtækisins allt til ársins 1982, þegar Gunnar M. Hansson tók við.